Cualité de vita tla provinzia da Balsan

Active Image Dan da püch à le jornal economich Sole 24 Ore publiché na tlassifica sön la cualité de vita tles provinzies talianes. Te cheësta tlassifica vëgnel tut en conscidraziun deplü valurs, sciöche l’ordinn publich, les infrastrotöres, l’ambiënt, la natalité, le tenor de vita y i.i..

Ći che colpësc deplü che l’8. post é sciöche Balsan à pordü 5 posć respet al ann denant. Chësc va splighé cis da un n indesc, chël dl tenor de vita che mosöra la forza da cumprè di residënć dla provinzia en raport ai prisc. Te chësta tlassifica stlüj jö la provinzia da Balsan al 69. post sön 107 provinzies. N resultat che dess lascè ponsè sura tröp.
I savun che a livel de provinzia é i prisc cotan plü alć che altró, l’inflaziun é danter les plü altes y le sistem destributif püch efiziënt.
Le fat che la provinzia ne pò nia plü se anuzé dla svalutaziun competitiva dla lira ne fej nia ater che agravè ćiamò deplü la situaziun. Plü che la situaziun atuala é preocupanta la manćianza completa de vijiuns da pert dl’ aministraziun provinziala che portarà ti proscimi agn a perde tres deplü posiziuns.
L’economia stënta y é prinzipalmënter basada sön le turism che ne basta nia por ti dè solidité a n’ economia. Le setur terziar é en dificolté, al manćia l’inovaziun y les forzes de laûr cualificades va foradecà.
Al mëss gnì ponsè danü le sistem economich dl Tirol dl Süd, al dess se basè sön les competënzes y le mirit plü che söla partignüda etnica o politica. Les regoles dess ester tleres por düć y nia basades sön na regolamentaziun ad personam. Le tëmp de na politica basada sön la tutela etnica dla mendranza todëscia é rové y porta ma a dagns por döt le sistem economich local.
Plü iadi à bele Ladins Dolomites invié a na mësa torona sön reformes economiches strotorales a livel provinzial, mo cis i partis todësc, cun val’ezeziun, ne à nia dè resposta.

Ladins Dolomites

comentars

Scriv

Chier