Plü che les parores cunta i fać/ N valgünes chestiuns che adora na resposta

Active Image La pröma chestiun che adora respostes tleres é chëra dla viabilité tles y danter les valades ladines. Al à bastè i sciori de Sant Ambrogio por mëte la viabilité en tilt te plü localitês ladines. Les infrastrotöres prejëntes é inadeguades. La política a Balsan ne fej de chësc vers degüna bela figöra. Ma propaganda politica da pert dla SVP che impormët zirconvalaziuns dan les lites sciöche a Sëlva da realisé magari te vint agn, canche vignun sa che le proiet presentè sarà oramai inadeguè.

Le daz sön le ju de Frara é n ater ejëmpl. An ċiara de ti vëne ai ladins che mëte sö n daz sön le ju de Frara y Sela portes al smendrimënt dl trafich y che chësc daz, por ne ti fà nia n tort ai foresć mëss inće gnì paié dai ladins. L’ipocrisia ne po nia ester plü grana. Sce an ô le smendrimënt dl trafich, cis i dis plü critics, él da tó d’atres mosöres, sciöche por ejëmpl n contingentamënt dl trafich sö por i jus (vigni ora pol passè n cer numer de auti); contingentamënt che ne dess nia varëi por i residënć. Al bastass informè adeguatamënter le scior che al toles spo n’atra strada, chësc pormetess de gestì damì la situaziun; mo chësc ne ôn nia fà.
Che inće zënza le trafich de transit resta la viabilité te Gherdëna problematica, àn odü cun les ultimes nevüdes, olache le ju de Frara é stè stlüt y impò ne rovân nia inant cun l’auto, cis te Sëlva. Sëlva, independentamënter da döt, adora na zirconvalaziun che ais le mënder impat ambiental y visibl (cun d’atres parores dess passè la zirconvalaziun sot tera fora). Insciö inće por Urtijëi, Corvara, La Ila y Longega.
Por ći che reverda le ju de Frara adóron val debojëgn da ciafè na soluziun che pormëtes che le ju restes davert tres. 10 cm de nëi ne po nia ester la gauja por le sarè jo. Le gran problem é sot Mür Frëit fora y dailò bàstel assiguré chël tòch de strada de ca. 2 km por miorè sensibilmënter la situaziun. Mo al pê che la politica ne ois nia le fà. Che Balsan ô tignì despartis i ladins él inće oramai düć he s’un à intenü.
I ladins a livel provinzial dess a düć i livì gnì reconesciüs sciöche terza y plü debla mendranza che adora na tutela particolara.
N ladin dess podëi avëi azès a dötes les inćiaries a livel provinzial, sciöche inće a chëra de “Landeshauptmann”; la cherta de identité dess gnì dada fora ti trëi lingac, i documënć ofiziai dla provinzia inće y zënza ezeziuns ti trëi lingac. Ma insciö podaràn baié de valianza de dërć.
Inće de chësc vers ôl ester fać y no parores o ćianties de zircostanza por fins eletorai.

Ladins Dolomites

comentars

Scriv

Chier